صَبَاحاتَكْ

صَبَاحاتَك ..
أمل باكر

نغم كلمات ..
على الخاطِر

تتاور حِسّك المجروح

وتلهب صوتك المبحوح

مع لحظة مروق الروح

على حضرة غناويكا ..!!

صدى الغنوات ..

بحرِّكْ فى دواخلك خوف
ويطْلع من عيونك شوف

زمن تتعتّم الرؤيا

وتولِّد فيكَ ماضيكا ..!!

تسوقك لى حُزن طوّل

تختَّك فى زمن أوَّل

وماتلقى البداويكا ..!!

ولون الحاضر الباهت

مع نفسك مخاويكا ..!!

فيا ساكن فؤاد الروح ..

أخيرلك صحِّى فيك إنسان

تجرّد من هواجس الظن

وغنِّى غناكَ لو أمكن

واذا ضاقتبك الدنيا

حكِّم فى خطاويكا

وشطِّف بالغُنا الأحزان ..!!

صَبَاحاتَكْ ..

بيُّض يازول
بصدق القول

وقول الكلمه

للزمن الصبح مجهول ...!!!

يازول يا كيف ..

يازول ياكيف ..
يامطره ترش
فى عز الصيف
ياروح بتقش
جوّاى الزيف
طمنِّى عليك
ورينى وحاتك
عامل كيف ..؟
فاقداك الروح
لى وين ماتروح
القلب ينوح
يبراكَ محل ماترسى خطاك
بى شوق مفتوح ..!!
تتذكَّر يوم ماكنت معاى ؟؟
وانا مانسَّاى ..
أنا كان لاقيتك آخر الليل
جوّات الكاس
يوم كنت براى ..!!!
شرّيتو غناى
قدّام الريح
سامرنى صداى
بى عشق جريح
والناس بتصيح
فى يوم بكَّاى ..!!!
تتذكَّر يوم ماكنت معاى ..؟؟
يوم كان بيناتنا
الدنيا خريف
وكان نُقَّاط المطره
خفيف ..
وكان إحساس القعده
لطيف ..
بس كان يوم باكر
شكلو مخيف ..
يازول يا مادِّى الدنيا نضار
بى حُزن شفيف ..!!!
تتذكَّر يوم ماكنت معاى ..؟؟
وانا مانسَّاى ..
يا أجمل ما غنّاهو غناى
يا وعد جميل
إتفضَّل جاى
أنا عازمك فى جوّايا
مقيل ..
يا زول يا نيل ..!!!

عرفْناكى

                             

عرفناكى ..
وزادت حرقة الأشواق
كبر جوّانا معناكى
ووين مادسّتك أحزان
أكيد فى يوم حنلقاكى
نصارحك بالحنين والريد
ونحلف بالّذى سوّاك
كلّنا نحنا نهواكى ..
عرفناكى ..
سليلة أرضنا الطيبه
مطيرة خير _ سألناكى
ومرقنا على الشوارع حُب
ندهناكى
تعالى نغيِّر الأيّام
نشد حيل الغنا المكسور
تعالى نحقِّق الأحلام
ونفتح فى المداين نور
تعالى نكضِّب الأوهام
نغرِّد بالحقيقه طيور
ونكشف للّذى مستور
معذِّب طرفِك الباكى ..!!
عرفناكى ..
وفى ضهر النخيل والنيل
لمحناكى
وفى طرف البيوت النايمه
شفناكى
مكندكه بى حُجى اللُمَّات
وبى صدق الضمير المات
تحنسى فى الصباح الفات
يطل فجر الخلاص قنديل
ليل الحُزن هدّاكى ..!!!
وعرفناكى .. 

عندما يذهب الشهداء للنوم

عندما يذهب الشهداء للنوم، أصحو لأحرسهم من هواة الرثاء، وأقول لهم تصبحون على وطن ...!!

محمود درويش

عفوا" حزينا" ياقدر

ماعاد فى الأشياء مايدعو البكاء

لكنّها .. هى إندلاق النطفة الأولى

على رحم القصيد

حزنا" ثقيل الظل يسكُننى

ويُسكِننى ابتسامة فى محاريب العزاء

ألم يطاردنى كثيرا"..

عند أطراف النهار 

وحين آناء المساء..

زخم من الأورام  والتفاصيل

المريضه

ترقد تحت جلدى

إنسان جميل ..

لكنّنى سأقولها عمدا" علانيّه للحروف

وبالحروف وفى الحروف ..

ماعدت أحتمل النـــــــــــواح  ...!

********

بين صحوة الميّت

وانبعاثك فى الخلايا

وبين رؤية المخفى 

احتجابك فى الحنايا

وضجّتك لامن تمد فيك الشروق

وخرير شعاعك فى الضحايا

وخبر جيتك جريح ..

كان شكل أترك على الواطه بيوضّح

رفض أشكال الوصايا

للشفّع الماشّين وراك

فى سكّة الزمن الكسيح ...!!

كان إنقسامك فى فراغ الدهشه

ثرثرة الرياح ..

وريتنا إنو الدنيا مازالت بخير

غنيتنا .. والشارع

أناشيد للفلاح ..
ومرقْت منّنا .. من بيوت الطين
عناوين للكفاح
وسمّيتنا زى ما تشتهى
سمّيتنا عشّاق للصباح ..!!
وكتمْتَ فى جوفك
عذاباتك براك ..
حُزنا" غِشاك ..
غَشَاك واتناغم معاك
واستوطنك .. ماوطّنك
يوم غبّش الإحساس
غناك ورطّنك ..!!!
ومرقْتَ بى حزنك مشيت
صفقْتَ سخريّه ومرارات للقدر
ياربّى مالك ؟
يوم مشيت راجينا نندهلك أقيف
ياعمّو قدّامك قطر ؟؟
ولّا كان صبرك على الحال العوج
جوّاكَ إنهدّ وفتر ؟؟؟
على أى حال ..
جيتك خريف الدنيا
يازول يا مطر ...!!!
ماتمشى بى حزنك تطوف
صفار الوجه فيك مألوف
طيور الجنّه قالنلك ..
بياض النيّه فيك معروف
قدر ماتدس تفاصيلك
يكون المخفى فيك مكشوف ...!!!! 

معاك ما كملت الأشواق

معاك ما كملت الأشواق

ولا فضّل بكانا نويح

ولا نامت شوارعك يوم

إذا كل البيوت بتصيح

تناديلك ..

بنيّات المطر    

عاقرات ..

وبى نيلك            

أرضْنا موات ..

إذا" ماذنبها الغيمات ؟

إذا رفّت جفون للريح  ..!!

صحيح  ..

كل البلد محموم

فكيف يبقى الزمان أجْمل 

إذا نفس النضال مكتوم ؟؟

دخلناك والشوارع خوف

متاريس بى حزن مشئوم

وبيبان البيوت شرفات

عنابر للأسى المردوم

ندهناك فى القرى النايمه

وساومناك بباقى الليل

طلع منّك صباح مأزوم ...!!

منو الادّاك قدرة إحتمال

للبين..؟

شنو الخلاّك تكون إتنين ..؟؟

صراع فى الذات

وإفراط فى الأنا الموهوم  ...!!!