يازول يا كيف ..

يازول ياكيف ..
يامطره ترش
فى عز الصيف
ياروح بتقش
جوّاى الزيف
طمنِّى عليك
ورينى وحاتك
عامل كيف ..؟
فاقداك الروح
لى وين ماتروح
القلب ينوح
يبراكَ محل ماترسى خطاك
بى شوق مفتوح ..!!
تتذكَّر يوم ماكنت معاى ؟؟
وانا مانسَّاى ..
أنا كان لاقيتك آخر الليل
جوّات الكاس
يوم كنت براى ..!!!
شرّيتو غناى
قدّام الريح
سامرنى صداى
بى عشق جريح
والناس بتصيح
فى يوم بكَّاى ..!!!
تتذكَّر يوم ماكنت معاى ..؟؟
يوم كان بيناتنا
الدنيا خريف
وكان نُقَّاط المطره
خفيف ..
وكان إحساس القعده
لطيف ..
بس كان يوم باكر
شكلو مخيف ..
يازول يا مادِّى الدنيا نضار
بى حُزن شفيف ..!!!
تتذكَّر يوم ماكنت معاى ..؟؟
وانا مانسَّاى ..
يا أجمل ما غنّاهو غناى
يا وعد جميل
إتفضَّل جاى
أنا عازمك فى جوّايا
مقيل ..
يا زول يا نيل ..!!!