يا جمالا

يا جمالا ..
البنيّه الخدَّرت جوّاى
مساحات بى دلالا ..

لوّعت فينى الكتابه

بى سمح قولا وفعالا

وسكَّتتنى ..
وكلَّمت فينى المشاعر

بى إجاباته وسؤالا ..!!

كمَّلت عندى القوافى

وهى زادت فى كمالا

ومهما أتغرّب واسافر ..

لسّه مسجون فى مدارا

وكل ماقرّبت ليها ..

يسبق الشوق ..

لى وصالا

ويا جمالا ..!!

البنيّه السمحه

فى كل المواقف ..

فى ابتساما وفى كلاما

وفى انْفعالا ..!!

زوله تملاك بالغناوى

زوله تبقالك حكاوى

ومن هموم الدنيا

تحميكَ وتداوى ..

زوله أجْمَل فى خصالا

ويا جمالا ..!!

البنيّه الشاربه

موية النيل سماح

والبنيّه الفى بيوت الطين

مقسّمه عيديّه وصفاح ..!!

البنيّه الودّرت

حزن الغلابه ..

البنيّه الصحَّتْ

احلام التعابه ..

والبنيّه الوقَّفتْ

سيل الكتابه ..

بى بريق الصحو فيها

وامتثالا ..

ويــــــــــــا جمـــــــــــــــــــــــــــــــــــــــــــــالا ..!!!